إزاي أعرف إن إبني اتعرض لـ التحرش؟

وإزاي تتصرفي وتحميه؟

ما هو التحرش؟

التحرش بالأطفال هو أي سلوك غير لائق بيستهدف الطفل وبيسبب له أذى نفسي أو جسدي أو جنسي. وغالبًا بيكون المتحرش شخص معروف للطفل أو مقرب من العيلة، وبيستغل ضعف الطفل وعدم قدرته على الفهم أو الرفض أو الدفاع عن نفسه.

طب هل مثلا التحرش هو جسدى فقط الاجابه لاء طبعا ✍️على سبيل المثال 
تحرش لفظي، تحرش جسدي، تحرش بصري، أو تحرش إلكتروني.

أولًا: 6 علامات لو لاحظتيها على طفلك لازم تنتبهي فورًا

1- تغير مفاجئ في سلوكه العام
لو فجأة بدأ ابنك يبقى عصبي، منعزل، بيعيط من غير سبب، ما بقاش عايز يشوف أصحابه،  او حتى يلعب اللعب إلى كان بيلعبها المختصر تغير في سلوكه ككل  بدأ يكذب بشكل متكرر من غير سبب واضح، ده مؤشر لازم ياخد بالك منه

2- خوف غير مبرر من شخص معين أو من أماكن معينة

لو بقى فجأة بيخاف من حد كان بيشوفه عادي أو أماكن كان بيروحها وهو مرتاح االنادى مدرسته بيت حد معين كنتوا بتزوروه عادى  زى مثلا أوضة معينة، أو العربيات، أو الأماكن المغلقة أو الواسعة، أو حتى صوت معين.. لازم تعرفي إن الخوف ده مش طبيعي

3- كوابيس متكررة أو تبول لا إرادي

لو ابنك بدأ يصحى مفزوع بالليل وبيحكي عن حاجات بتخوفه أو بدأ يتبول لا إرادي بعد ما كان اتخلص من المشكلة دي،  او بيمسك نفسه عن الحمام أو بيقعد فترات طويله فالحمام على غير العاده فده ممكن يكون ناتج عن ضغط نفسي أو تجربة صادمة

4- كلام أو تصرفات مش مناسبة لسنه

لو بدأ يسأل عن مواضيع جسدية أو يتصرف تصرفات مش مناسبة لعمره، أو بيكرر ألفاظ غريبة أو بيلمس نفسه أو غيره بشكل غير مفهوم.. فده مؤشر خطر

5- شكوى من ألم أو احمرار في المناطق الحساسة

من غير سبب طبي واضح، أو لو لاحظتي إنه بيقعد فالتواليت كتير أو بيحاول يمتنع عن دخول الحمام رغم إنه محتاج، فده بيشير لاحتمالية وجود تجربة سيئة حصلت له

6- رفضه للكلام أو الحكي عن أي حاجة

لو سألتيه عن سبب تغير حالته ورفض يرد أو تهرب من الكلام أو قالك إنه مش فاكر، أو حتى لو فضل ساكت فترة طويلة.. لازم تصبري عليه وتحترمي صمته بس تتابعيه كويس

ثانيًا: لو اتأكدتي أو حتى شكيتِ إن ابنك اتعرض لـ التحرش.. اتصرفي فورًا بهذه الخطوات:

1- كوني هادية مهما كان الخبر صادم

أهم حاجة تباني قدامه إنك متماسكة، مش هتزعقي، مش هتلوميه، ولا هتخوفيه. لأن خوفك أو عصبيتك هتخليه يقفل أكتر، ويفقد الثقة في الحكي تاني

2- طمنيه وادعميه نفسيًا

قولي له بصوت هادي: "أنا مصدقاك.. بحبك مهما حصل.. وشكرًا إنك حكيتلي.. إنت شجاع وواثق فيا، وده معناه إنك قوي"

3- ما تحاوليش تضغطى الحوار.. سيبيه يحكي بطريقته

ما تكترش عليه الأسئلة، ما تقطعيش كلامه، حتى لو بيتلخبط أو بيقف كتير، سيبيه يخرج اللي جواه، ولو سكت كملي حضن وطمأنة

4- خدي خطوة قانونية لو الوضع استدعى

لو قدرتي تحددي هوية الشخص المؤذي، ما تتردديش، لازم يكون في موقف قانوني رادع، سواء كان جار، قريب، أو حتى شخص في المدرسة، لكن بالطريقة الرسمية

5- اعرضيه على طبيب نفسي متخصص

لازم يساعده متخصص علشان يتجاوز التجربة ويحمي نفسيته من أي أثر مستقبلي،
خصوصًا لو كان صغير في السن، لأن التراكمات دي ممكن تأثر على شخصيته وهو كبير