نشر في الرياض يوم 20 - 05 - 2025

وأشوف (ليلي) جافلٍ من (نهاري)!
بكيت عهدٍ فات مرّة ومرّات
ولا رجَّع الماضي غزير العباري
مْنوّلٍ ما نلحِق الوقت حسرات
لاهين في لعب الضحى والعصاري
واليوم يا دنيا الشقا كلّك آهات
والقلب بدروب التباريح ساري
ليت العمر يرجع لثنتين خمسات
طفلٍ يخاف مْن الخلا والغداري
ولْيا اشرقت في مبسم الشمس ضحكات
تشرق براءتنا بوَجه الحواري
لا همّ.. لا حسرة.. ولا عشت لوعات
ولا تطري فْ بالي هجوس وْطواري
ومن عقبهن لا تمّ ثنتين سبعات
ياقف عليهن.. للزمن ما يباري
وأدري مَ تنفع «ليت» في فايتٍ فات
ولا راسي مْن العقل والفكر عاري
مير الحنين لْذيك الايام بالذات
عقّب بخفّاقي رماح وْشباري
سنّ الصِّبا.. حلو المسا والصباحات
يشتاق له من في حلاته يماري
يوم المطر ما بين ديمة وغشنات
والما بهونٍ بالمداهيل جاري
ناخذ «مسيل الضَّمو» روحات.. جيّات
ونرعى البَهَم ما بين خضر البراري
نصنع من اصناف النواوير باقات
ونطرب لشدو طْيورها.. والقماري
وليت الهواجس خلّت الخاطر يْبات
وليت الهوى ما له على البال طاري

انقر هنا لقراءة الخبر من مصدره.