لوازم منزلية

لوازم منزلية

 

- ألو..

- ألو..

- أيوه مين؟

- أيوه يا ماما..

- أيوه مين معايا؟

- إيه يا ماما مش عارفة صوتي؟ أنا هدى بنتك..

- أهلا يا هدى.. ازيك يا حبيبتي؟

- يا ماما ما قلت لك ميت مرة سجلي نمرتي عندك..

- ما انت عارفة يا بنتي اني ما بافهمش في الموبايلات والحاجات دي.. لما تيجي المرة الجاية ابقي خلي هيثم يضبطه لي.. ازيّ هيثم صحيح والولاد؟

- الله يسلمك كويسين.. المهم.. أنا باكلمك من كارفور.. شوفي لو عايزة حاجة أجيبها لك معايا بالمرّة..

- تسلمي يا بنتي عايزة سلامتك..

- يا ماما هو أنا باقول لك عايزة حاجة م السعودية؟ شوفي إيه البقالة اللي محتاجاها أجيبها لك معايا بدل ما تنزّليني تاني مخصوص علشان أجيب لك..

- طيب.. استني كده لما أشوف الثلاجة..

- .................

- ..............................................................................................................................................................................................................................................................................................................................................................................................................................................

- ألو؟

- .............................................................................................................................................................................................................................................

- ألو؟ انت رحت فين؟

- ............................................................................................................................................................................................................................................... أيوه يا هدى معلش يا بنتي طولت عليكي..

- ولا يهمك..

- شوفي بقى.. عايزة زبادي.. بس ما تجيبيش غير جهينة..

- كام واحدة؟

- جهينة بقول لك.. هه؟

- أيوه يا ماما ماشي.. كام واحدة؟

- لو ما لقيتيش جهينة ما تجيبيش..

- خلاص يا ماما عِرفت..

- أصل آخر مرة جبت لي نوع ما اعرفش اسمه إيه كده كان وِحِش قوي.. وانت عارفة انّي لازم آكل زبادي كل يوم قبل ما أنام..

- يا ماما خلاص عِرفت.. كام واحدة؟

- اللي تجيبيه مش هيخسّر.. لو عليه عَرض هاتي كثير ما أنا كده كده باستعمله..

- 10 مثلا؟

- ماشي.. بس جهينة بقول لك..

- إيه تاني؟

- هو الجهينة اللي بيرحني قبل النوم..

- خِلِصْنا يا ماما بقى من موضوع الزبادي.. خلاص رصيدي هيخلَص أنا باكلمك ع الموبايل..

- يوه يا بنتي أنا آسفة.. طيب يبقى كده قلنا زبادي جهينة.. إيه تاني.. عايزة كيلو لبن أي نوع مش هتفرق.. هه؟

- ماشي.. إيه تاني؟

- بس بلاش لبن بخيره ده أحسن آخر مرة لما غليته قَطَع.. هاتي صباحو أو جهينة.. ولا أقول لك.. هاتي جهينة وخلاص..

- إيه تاني؟

- يبقى كده قلنا زبادي ولبن.. آه! عايزة ليفة مواعين.. هاتي كام واحدة كده.. وسلك مواعين برضه..

- ما فيش سلك مواعين في كارفور.. هابقى أجيب لك من أي بقال..

- أمال كارفور إيه وبتاع إيه اللي طالعين لي بيه السما وفيه م الإبرة للصاروخ.. وفي الآخر تقولي لي مافيش سلك مواعين؟

- معلش يا ماما.. إيه تاني؟

- ده كلام برضه؟

- يا ماما حرام عليكي هنقعد ساعة ع الموبايل علشان طلبين ثلاثة؟ قولي باقي الطلبات مرة واحدة..

- خلاص يا هدى انت هتتنرفزي عليّ كمان؟ على آخر الزمن بنتي تزعق لي..

- أنا آسفة يا ماما معلش.. قولي الباقي بس علشان رصيدي هيقطع..

- ده ولا كإني خلفتك ولا شلتك على كتفي ولا ضحيت براحتي وشغلي علشان تكبري وتبقي بني آدمة.. بتزعقي لي؟ إخص إخص إخص..

- يا ماما آسفة قلت لك..

- مش عايزة حاجة خلاص..

- خلاص يا ست الكل ما تزعليش.. كملي بس باقي الطلبات..

- قلت لك مش عايزة حاجة..

- أجيب لك جبنة بيضاء علشان الفطار؟ عندهم الجبنة اللي بالفلفل الأخضر اللي بتحبيها..

- طيب ماشي.. هاتي ربع كيلو.. بس تبقى طازة..

- حاضر.. إيه تاني؟

- لو مش طازة ما تجيبيش أنا باقول لك أهو..

- ماشي هاتأكد.. إيه تاني؟

- هاتي كمان جبنة نستو.. المثلثات دي..

- كام واحدة؟

- بس هاتي بريزيدون بلاش الأنواع التانية دي..

- قد إيه؟

- واحدة بس..

- حاجة تاني؟

- لا كفاية عليكي كده..

- طيب..

- لو افتكرت حاجة تانية هابقى أرن عليكي..

- ماشي يا ماما.. مع السلامة دلوقت..

- خلي بالك من نفسك..

- حاضر يا ماما..

- وبلاش هيثم يجري في السكة وانتو راجعين.. علشان العربيات النقل اللي بتبقى ماشية ع الدائري..

- حاضر يا ماما.. يلا مع السلامة..

- مع ألف سلامة..

التعليقات