احترس من الحارس

احترس من الحارس

 

- يا أستاذ.. يا أستاذ.. انت يا أستاذ..

- انت بتكلمني أنا..

- أيوه انت.. رايح فين يا أستاذ؟

- وانت مالك؟

- أنا بواب العمارة دي ولازم أعرف انت رايح فين..

- وهتستفيد إيه لما تعرف أنا رايح فين؟

- لازم أعرف..

- أيوه هتستفيد إيه؟

- أنا البواب ولازم أعرف..

- يعني هتستفيد إيه برضه؟ انت عمال تعيد وتزيد وما بتردش على السؤال..

- ممكن لا مؤاخذه يكون حد حرامي داخل..

- أنا داخل من الباب.. لو شفتني طالع على المواسير ابقى اسألني رايح فين..

- لا يا بيه لازم أسألك برضه أنا إيش ضمنّي..

- طالع الدور الخامس يا سيدي..

- عند مين؟

- العيادة..

- طيب اتفضل..

- لما انت عارف إن فيه عيادة فوق وطبيعي الناس تطلع العيادة في مواعيدها لازمته إيه كل ما حدّ يدخل تقعد تسأله رايح فين وجاي منين؟

- لا مؤاخذة يا بيه.. لازم كده..

- افرض طيب أنا قلت لك طالع الدور الخامس وبعدين سهّيتك وطلعت الدور السادس هتعرف منين ساعتها؟

- لا يا بيه انت شكلك محترم وما تعملهاش..

- هو اللي بيطلع السادس هنا بيبقى مش محترم..

- لا قصدي إنك مش هتكذب..

- وانت هتستفيد إيه لما تعرف إني طلعت الخامس ولا السادس؟

- لازم يا بيه..

- لازم ليه؟

- أنا البواب وشغلتي كده..

- شغلة متخلفة..

- لا يا بيه بلاش الغلط..

- أنا ما غلطتش فيك.. أنا باقول لك انت بتشتغل شغلة متخلفة..

- لا ما ينفعش الكلام ده..

- انت بتشتغل شغلانة مافيهاش إنتاج.. مافيش مُنتَج بيطلع من قعدتك قصاد الباب غير غلاستك على الناس.. ولما ييجي الحرامي بالليل بتكون نايم في أوضتك..

- .....................

- شغلانتك دي اسمها البطالة المقنّعة.. زيك زي سايس العربيات واللي بيقف على باب الحمام والعامل بتاع الأسانسير.. شغلانات مالهاش أي لازمة في المجتمع..

- هه؟

- الاقتصاد الناجح لازم يقوم على الإنتاج مش الخدمات.. اللي زيك هم اللي موديين البلد في داهية.. ولما الواحد يحاول يفهّم الواحد فيكم يلاقي الفهم ضعيف والتفكير منعدم..

- يا بيه..

- عمر البلد ما هتتقدم بالشكل ده..

- يا بيه سيبني الله يرضى عليك أنا مش فاضي.. الناس داخلة طالعة م الباب ولازم أشوف مين اللي داخل ومين اللي خارج..

- شفت؟ ولا كإنك فهمت حاجة من اللي أنا قلته.. صحيح.. لكل داء دواء يستطب به.. إلا الحماقة أعيَت من يداويها..

- اتكلم انت مع نفسك بقى أنا رايح أشوف شغلي..

- استنى هنا مش باكلمك..

- عايز تطلع الخامس تطلع السادس عايز تولّع في أم العمارة.. مع نفسك بقى وما توجعش دماغي..

- انت يا بواب انت..

- سلامو عليكو!
 

التعليقات