اكسَر

7/31/2019 7:01:28 PM
722
قراء اليوم الجديد

ماري شاكر


 

"مبدأياً,كسراً للقاعدة..أول مرّة اكتب بالعامية.."

علشان نكون متفقين احنا طول حياتنا عايشين في قفص..مهما كنت فاكِر نَفسك حُر وعايِش حَياتك بالطول والعَرض..فانت برضو عايش في قفص.

جسدك لوحدُه قفص بيحِد نفسك..مُخك ده قفص..بيسيطر ويتحكم لو حاوِلت تهرب بأفكارك وخيالَك لبعيد.

الفكرة كلها في حجم القفص, ودي بقى الحاجة الوحيدة اللي انت تقدر تتحكم فيها.

يعني تعالى كده نتخيل روحنا عبارة عن إيه..فيه اللي هيقول روحي عصفور صغير, بسيط ومش عاوز حاجة من الدنيا غير شوية أكل على كام صاحب عَيِّنتُه..وكده تمام وسعيد وراضي..

فيه الحلو اللي شايف نفسُه..بغبغان بألوان كتير وحاجة عَظَمة وشيك جداً في نفسه ويحب الناس تتجنن عليه وعلى شكله ويكون مُبهِر.لكن في نفس الوقت ماتنساش..هتكون للفُرجَة وممكن شوية ضحك لما هتكرر كلام وأفعال من غير تفكير..بَس تمام..مبسوط كده وحلو أوي والناس منبهرة ..وأكل وشُرب وحاجة فخيمة..

فيه كمان الحمامة..جميلة ورمز السلام والوداعة ..لكن وبعدين؟؟! بتتحشي فريك وحاجة شُغل فنادق والناس بتستمتع وهي الضحية.

عَندَك بقى ياسيدي الروح الحُرّة, وهنا بتكُون النِسر..شُرب وأكل إيه!! ده انا هوايتي اصطادُه..انا اللي أجيبه وماحدِش يذِلِني عليه.

نسر عاوز يطير لفووووووق ويِعلَى..يفرد جناحاته ومايحِدهوش قفص.لكن اتفقنا ان لازِم قفص..يبقى نكَبَّر القفص شوية..شويتين تلاتة..

رَكِّز كده ولاحِظ..هَتلاقي أغلب الطيور بتطير في مجموعات..بيحتموا ببعض..لكن شوف كده النسور..هاا؟؟ شوفت إيه؟!! نسر مُكتفي بنفسه فوق عالي..طايِر وحُر.. لوحدُه..لكن حاسس بعَظَمتُه..حاسس ان السما دي مِلكُه..مَملَكته..عاوز انزِل شوية هنزِل..عايز ارجع مكاني فوووق هطلَع وهطلع أعلى كَمان.

روح النسر الحُرَّة بتخَليه يحس مش بَس بأزمة أوضيق..لأ.. بخطر لو اتحبس..لو ماقدِرش يِفرد جناحاته.

عيش نسر..رَفرَف بجناحاتك..ولو لقيت القفص ضيق وجناحاتك بتخَبَّط في جُدرانه اكسَرُه.

أيوة اكَسرُه..لكن خُد بالَك..لو لِسه مِش متعود تطير أوانك تتحكم في جناحاتك هتُقع وَقعة وِحشة أوي وتتكَسَر رقبتك..

وَسَّع في القفص لحد ما تخَلِّي قفصك الدنيا..العالَم كلّه, وحدودَك السما.. اطلَع لفوق وافرَد جناحاتك.. اتفَرَّج وشُوف وجَرَّب..

إغلط..أيوة اغلط..المُهِم الغَلطة ماتسيبش جَرح كبير يخليك ماتعرفش تطير تاني.

إندَم..بجد اندم..إندَم على حاجة عَمَلتَها أحسن ما تِفضَل تتحَسَّر على حاجات كان في إيدَك تعملها وماعَمَلتَهاش..

إحلَم..وماتِفضَلش مِستَني ان حِلمَك يقلِب كابوس..آخرُه إيه!! هينتهي نهاية حِلوة أو هَتِصحَى..

     انا من الناس اللي عَندَها قواعِد مُعَيَّنة في حَياتي مابَحبِش اكسرها..لكن بعد تجارب بتمُر بيها ومواقِف بِتلاقي ان القَواعِد دي غير المَبادئ.

     المبادئ ماينفَعش تتجزَّأ ولا يتشال منها حاجة على حساب حاجة لأنها جزء من تكوينَك وشخصيتك.

     لكن القواعد انت اللي عملتها وهي دي جدران القفص اللي انت جوَّاه, وروحك عمَّالة تكبر وخبراتك بتزيدك قوة وتلاقي نفسك القفص مش سايعَك..خَنقك..

     روحَك اللي شالِتَك كتير,ساعدتك وصبرت عليك أُنهكَت من كُتر ما بتحاوِل تفرد جناحاتها تلاقي شئ بيعوقها وترجع تستكين في مكانها من الإحباط..

     لكن خلاص بتيجي في مَرحَلة مُعينة مش هتقدَر تسكُت عليك اكتر من كده..ممكن تتكسر وماتلاقيهاش..

     كافئ روحك ورُد الجميل لنَفسك..

     إكسَر القفص وخَلِّي روحك تفرِد جناحاتها وترَفرَف لبعيد..

     إكسَر القفص اللي سَجَنت روحك فيه..روحك اللي اتسجَنِت ظُلم..اتسَجَنِت من غير ذنب أو جُرم..

     روحَك اللي محتاجة تتحَرَر بَدَل العبودِية والساقية اللي رَبَطتها فيها جُوه قفص كل يوم تعلَى جُدرانه وتخنُقها وتقفِل عليها أي منفَذ هوا..

     روحك اللي جِيت عليها كتير علشان مُجتمع وناس ونظراتهم اللي عَمَلت مِنها باب للقفص وقَفَلتُه بمية قِفل..

     عِيش نسر..بروح حُرَّة..كاسرة كل قواعِد سَجَنتها فيها سنين..سيبها تنطلق لفوق..تشوف وتجَرَّب وتوصل لحدود ماكانِتش في خيالها..

     اكسَر القواعِد..

اليوم الجديد